Trajneri i kombëtares shqiptare, Xhani De Biazi, ka publikuar mesditën e së shtunës listën e 24 lojtarëve që ka thirrur për ndeshjen e parë kualifikuese në Grupin I të “Euro 2016”, ndaj Portugalisë. Kjo sfidë do të luhet më 7 shtator në “Municipal de Aveiro”, në orën 20:45, duke shënuar startin e fushatës kualifikuese të kuqezinjve tanë. Sikurse dihet, Shqipëria ka rënë në një grup të vështirë me pesë skuadra, ku bëjnë pjesë edhe Portugalia, Danimarka, Serbia dhe Armenia.
Në listën e publikuar nga trajneri italian bien në sy jo pak ndryshime, këto të diktuara edhe nga mungesat e detyrueshme për shkak dëmtimesh. Kështu, Migjen Basha, Armando Sadiku dhe Alban Meha nuk mund ta ndihmojnë kombëtaren në këtë transfertë të vështirë, sepse janë jashtë veprimit edhe me skuadrat  tyre, duke u rikuperuar nga lëndimet. Po ashtu, një tjetër titullar i padiskutueshëm i kuqezinjve, Valdet Rama, nuk është ftuar, pasi vetëm një ditë më parë arriti të nënshkruante me një skuadër të re, Mynih 1860. Duke qenë pa praktikë loje, De Biazi nuk ka besuar te lojtari virtuoz me topin dhe mjaft teknik. Rikthim në kombëtare bën Ervin Bulku, që ka munguar në sfidat e fundit miqësore, ndërsa për herë të parë vjen Taulant Xhaka. Një futbollist ky i pajisur me pasaportë shqiptare prej kohësh, por për shkak dëmtimesh nuk ka mundur të debutojë akoma me Shqipërinë. Ndoshta ndeshja me Portugalinë ia mundëson një gjë të tillë lojtarit të Bazelit.
E reja është në sulm dhe mban emrin e Bekim Balajt. Shkodrani nuk e ka për herë të parë grumbullimin me kombëtaren, megjithatë nuk mund të thuhet se ka qenë përherë zgjedhje e De Biazit (hera e fundit kur është thirrur daton në nëtor 2013, në miqësoren kundër Bjellorusisë). Konfirmohet në radhët e kuqezinjve edhe sulmuesi kavajas, Sokol Cikalleshi, që tashmë është transferuar në kampionatin kroat, ashtu si edhe Debatik Curri, mbrojtësi prishtinas, që iu është bashkuar bardhebluve në sezonin e ri.
I shumëdiskutuari Emiljano Vila, lojtari i Partizanit, për të cilin De Biazi tha se ka bërë hapa pas me rikthimin në kampionatin shqiptar, e ka rujatur vendin e vet në kombëtare. Pra, pavarësisht polemikave që shkaktoi emri i tij, asgjë nuk ka ndryshuar në këndvështrimin e trajnerit të kombëtares. E vecanta tjetër ka të bëjë me rikthimin e Burim Kukelit në ekipin tonë përfaqësues. Lojtari në fjalë ka kaluar një dëmtim të rëndë dhe prej shtatorit 2012 nuk ka qenë më pjesë e kombëtares. Mesfushori i FC Zyrih ka luajtur 4 ndeshje me Shqipërinë dhe është rikthyer të aktivizohet me skuadrën e tij, ndaj edhe De Biazi e ka thirrur për kualifikuesen e parë në grup.
Prurje e re, që ftohet për herë të parë në kombëtaren e madhe, është edhe ajo e Herolind Shalës. Lojtari në fjalë deklaroi kohët e fundit se nëse Shqipëria nuk ka nevojë për të, atëherë do të marrë në konsidëeratë aktivizimin me Norvegjinë, ku luan dhe ka shënuar disa gola të rëndësishëm së fundi. Ai ka veshur fanellën e ekipit Shpresa dhe tashmë i jepet mundësia të tregojë veten me përfaqësuesen e madhe. Në mbrojtje nuk figuron Loret Sadiku, lojtari i shumëdiskutuar, i cili kërkoi garanci nga menaxheri i kombëtares, Alban Bushi, për të qenë titullar i padiskutueshëm. Gjë e cila nuk është pranuar nga stafi drejtues i kuqezinjve, ndaj mesa duket është hequr përfundimisht dorë prej tij, edhe pse u bë cmos për ta pajisur me pasaportë shqiptare. Pjesa tjetër e lojtarëve të thirrur janë të njohur dhe kanë qenë rregullisht nën urdhërat e De Biazit në miqësoret dhe ndeshjet e kaluara zyrtare.
De Biazi - Trajneri i Kombëtares së Shqipërisë, Xhani de Biazi, ka zhvilluar të enjten në sallën e konferencave të Federatës Shqiptare të Futbollit konferencë për shtyp me mediat shqiptare në lidhje me fillimin e Eliminatoreve të Kampionatit Europian, “Francë 2016”. Ai është shoqëruar në këtë konferencë për shtyp nga menaxheri i skuadrës kombëtare Alban Bushi. Duke e vlerësuar si mjaft të fortë grupin eliminator, De Biazi konfirmoi se objektivi parësor për skuadrën është kualifikimi i mundshëm në Europian, por çdo gjë duhet parë hap pas hapi, duke vlerësuar çdo ndeshje të veçantë. Sa i takon Portugalisë, trajneri kuqezi e vlerësoi atë si një skuadër shumë të mirë, e cila pas dështimit në Botëror ka të gjithë dëshirën dhe grintën për t’u ringjitur në nivelet më të larta të futbollit në kontinent. “Ne do të shkojmë atje për të luajtur shanset tona. E dimë mire se ata do të kërkojnë ta zgjidhin çështjen e rezultatit sa më shpejt të jetë e mundur. Por ne do të përpiqemi të mbyllim hapësirat dhe ta godasim në befasi,” – u shpreh De Biazi, duke mos përjashtuar mundësinë që Shqipëria të arrijë rezultat pozitiv në këtë ndeshje të vështirë.

Ja lista e kombëtares
1.Etrit Berisha
2.Orges Shehi
3.Ansi Agolli
4.Lorik Cana
5.Debatik Curri
6.Elseid Hysaj
7.Emir Lenjani
8.Andi Lila
9.Mergim Mavraj
10.Amir Abrashi
11.Ervin Bulku
12.Ergys Kace
13.Burim Kukeli
14.Taulant Xhaka
15.Emiljano Vila
16.Bekim Balaj
17.Sokol Cikalleshi
18.Shkelzen Gashi
19.Jahmir Hyka
20.Edmond Kapllani
21.Odise Roshi
22.Hamdi Salihi
23.Armando Vajushi
24.Herolind Shala

Kombëtarja, 6 ditë grumbullim në Spanjë para Portugalisë
Shqipëria do ta përgatisë nga Spanja ndeshjen e parë eliminatore për kualifikueset e “Euro 2016″-s kundër Portugalisë, që do të luhet më 7 shtator në stadiumin “Municipal de Aveiro”. Kombëtarja kuqezi do të grumbullohet më 1 shtator në qytetin e La Korunjës, aty ku do të stërvitet për gjashtë ditë. Trajneri Xhani de Biazi ka bërë këtë zgjedhje për shumë arsye. Një nga motivet më kryesore është afërsia gjeografike që ka qyteti i La Korunjës me vendin ku do të zhvillohet ndeshja. Burime në FSHF treguan dje për “Panorama Sport”, se e veçanta e këtij grumbullimi është që vetëm një ditë para ndeshjes skuadra do të udhëtojë me autobus drejt Portugalisë. Nga La Korunja deri në qytetin e Aveiros rruga zgjat tri orë e gjysmë dhe De Biazi ka qenë dakord që të mos përdorej avioni, përderisa vendi ku do të stërviten kuqezinjtë është shumë afër me qytetin ku do të zhvillohet ndeshja. Pas udhëtimit me autobus, ekipi do të grumbullohet në një nga hotelet e Avieros dhe më pas do të zhvillojë stërvitjen zyrtare në stadium. Në vitin 2009, kur kuqezinjtë luajtën në Braga ndaj Portugalisë dhe morën një rezultat historik (0-0), udhëtimi është bërë me çarter nga Budapesti për në Porto. Ndërkohë, gjatë qëndrimit në Spanjë mësohet se Kombëtarja do të zhvillojë një miqësore me një nga skuadrat vendëse, por emri s’bëhet i ditur.
Biletat - Tifozët shqiptarë që do të mbështesin Kombëtaren në Portugali mund të blejnë biletën në FSHF. Kjo e fundit ka njoftuar mediat se për të gjithë të interesuarit, duke filluar nga data 20 gusht deri më 31 gusht, biletat do të jenë të disponueshme pranë institucionit të futbollit. Biletat për tifozërinë shqiptare do të jenë të dy kategorive të ndryshme me çmimet respektive 10 dhe 20 euro. “Këshillojmë tifozët të blejnë biletat vetëm pranë FSHF-së dhe të mos paguajnë kosto ekstra, pasi çdo çmim tjetër do të ishte abuzim dhe shkelje ligjore, për të cilën FSHF nuk mban përgjegjësi”, bënte të ditur FSHF.

Thirrja e TKZ-së: Të mbështesim kuqezinjtë
Grupimi i “Tifozëve kuqezi” u ka bërë thirrje të gjithë shqiptarëve dhe veçanërisht sportdashësve shqiptarë që të mbështesin pa rezerva Kombëtaren për kualifikimet e Europianit 2016. “Tifozët Kuq e Zi do të vazhdojnë rrugëtimin e tyre në përkrahje të fanellës së kuqe me shkabë dhe do të jenë ata që edhe në transfertat të ngrenë emrin e shqiptarit dhe Shqipërisë lart e më lart. Ndeshja e parë eliminatore për këtë vit është ajo e 7 shtatorit kundër Portugalisë në Aveiro. Kjo është edhe ndeshja e vetme e Kombëtares tonë, për muajin shtator. Në muajin tetor, në stadiumin e rinovuar të Elbasanit do të luajmë në shtëpi përballë Danimarkës dhe vetëm katër ditë më pas do të udhëtojmë drejt Beogradit për sfidën me Serbinë. Andaj, sot Shqipëria më tepër se kurrë ka nevojë për ty shqiptar, sot asaj i duhet përkrahje maksimale drejt një rrugëtimi historik, drejt një ëndrre të brezave të tërë”, thuhet në deklaratën e TKZ-së.

Ronaldo mungon ndaj Shqipërisë, “qan” Portugalia
Portugalia do të bëjë pa Kristiano Ronaldon në ndeshjen e parë eliminatore kundër Shqipërisë, që do të luhet më 7 shtator në stadiumin “Municipal de Aveiro”. Lajmi është konfirmuar dje nga trajneri i luzitanëve, Paulo Bento. Ky i fundit shpalli listën e të grumbulluarve për ndeshjen ndaj kuqezinjve, teksa binte në sy mungesa e yllit të Realit. “Kristiano nuk është gati për shkak të problemeve fizike, kështu që nuk mund të luajë kundër Shqipërisë. Në këto kushte, vendosëm që lojtari të mos grumbullohej”, – deklaroi Bento. Fituesi i “Topit të Artë” dhe çmimit “Lojtari më i mirë në Europë” pritet të jetë një mungesë shumë e rëndësishme për Kombëtaren luzitane, që për herë të fundit me Shqipërinë ka barazuar në Braga, 0-0. Megjithatë, te Portugalia janë të bindur se do të nisin një edicion me fitore. Trajneri Bento ka deklaruar për mediat luzitane se kualifikimi për në “Euro 2016″ nis nga takimi me kuqezinjtë e De Biazit. Gjithsesi, mungesa e Ronaldos duket se është një shpresë më shumë për ekipin e De Biazit përballë Portugalisë. Në listën e shpallur nga Bento binin në sy emra të njohur si Pepe e Koentrao në mbrojtje, Mutinjo e Meireles në mesfushë apo Nani në repartin sulmues.
Ndeshja - Në takimin e parë eliminator Portugali-Shqipëri pritet të ketë edhe tifozë shqiptarë në stadiumin “Municipal de Aveiro”. Gjatë këtyre ditëve, në FSHF ka pasur interesim për bileta nga një grup tifozësh kuqezi, të cilët e ndjekin Kombëtaren në çdo cep të Europës. Biletat për tifozërinë shqiptare do të jenë të dy kategorive të ndryshme me çmimet respektive 10 dhe 20 euro. Sot është dita e fundit për tifozët shqiptarë që duan të blejnë një biletë, teksa duhet të paraqiten në federatë.

PORTUGALIA
Ja lista e lojtarëve
PORTIERË: Eduardo (Dinamo Zagreb), Rui Patricio (Sporting Lisbona), Antoni Lopez (Lion);
MBROJTËS: Joao Pereira, Ruben Vezo (Valencia), Andre Almeida (Benfika), Fabio Koentrao, Pepe (Real Madrid), Antunes (Malaga), Rikardo Kosta (Al-Sailia), Neto (Zenit);
MESFUSHORË: Uiliam Karvalo, Adrien Silva (Sporting Lisbonë), Miguel Veloso (Dinamo Kiev), Raul Meireles (Fenerbahçe), Joao Mutinjo (Monako), Andre Gomes (Valencia), Pedro Tiba (Braga);
SULMUES: Nani (Sporting), Vieirinja (Volfsburg), Bruma (Gallatasarai), Eder (Braga), Ivan Kavaleiro (Deportivo), Rikardo Horta (Malaga);

Mbyllet java e parë e Kategorisë Superiore (kampionati i 76-të kombëtar), e cila prodhoi në total katër fitore dhe një barazim. Skuadrat e ashtuquajtura pretendente e kanë dëshmuar këtë gjë që në start, teksa kanë fituar ndaj kundërshtarëve respektivë. Madje, edhe në transfertë, sikurse ka bërë Kukësi i Artim Shaqirit në “Loro Borici”. Gjysmë hapi në këtë drejtim mund të konsiderohet barazimi i Partizanit në Lac, krahasuar me favoritët e tjerë, por mund të thuhet pa frikë se të kuqtë kishin transfertën më të vështirë kësaj jave. Të premten, sikurse dihet, Skënderbeu triumfoi minimalisht ndaj verdhebluve të rikthyer në elitë pas katër vitesh, ndërsa Flamurtari superoi me sukses 2-1 derbin e bregdetarëve, ndaj durrsakëve të Hasan Likës. Një ditë më pas, të dielën, Tirana e Gugash Maganit ka prodhuar mjaft lojë, ka shënuar tre gola me anë të Bakajt, Ndikumanës dhe Hyshmerit, ndërkohë që ka shpërdoruar shumë, sidomos me sulmuesin kroat Bushic. Ajo që vlen të theksohet nga kjo ndeshje është prania e konsiderueshme e tifozërisë bardheblu, që ka prodhuar spektakël të vërtetë, dicka e munguar në stadiumet e tjera në fillimin e këtij kampionati të ri. Apolonia e Fierit takohet me humbje me Superioren, ku kthehet rishtaz. Skuadra e Demirajt në pjesën e parë mund dhe duhej të kishte shënuar me sulmuesin Canka, por lushnjari ka shpërdoruar në dy raste ideale, ndërsa ka tronditur shtyllën e portës së Frashërit në minutën e 82-të.
Në “Loro Borici” ka pasur emocione, sepse Vllaznia ka bërë gjithcka për të evituar humbjen. E ndihmuar edhe nga tifozët e zjarrtë shkodranë, skuadra e Rainerit ka arritur të barazojë përkohësisht golin e Pero Pejicit (35’), me anë t Arenc Dibrës (43’), por në pjesën e dytë është ndëshkuar sërish nga verilindorët. Më konkretisht, shtatshkurtëri Vilfor Hysa ka kaluar në epërsi Kukësin (58’), i cili ka shfaqur vlerat e veta prej pretendenti në këtë kampionat. Në ndryshim nga kuqeblutë, formacioni i Artim Shaqirit shfaqi soliditet dhe kohezion mes reparteve, cka i dha edhe tri pikët e para në këtë kampionat. Vllaznia e shumë probelemeve, me presidencë të re, ka shfaqur dëshirë e grintë, por përballë një kunërshtari të kompletuar më së miri, i përbërë nga lojtarë me emër e shumë cilësi, nuk ka shkuar dot më tej se humbja 2-1. Ardhja e përforcimeve të fundit, e dy lojtarëve uruguajanë, ndoshta ndryshojnë dicka për mirë në radhët e kuqebluve, të cilët duket se janë të dënuar të luftojnë për mbijetesë në këtë kampionat.
Kryendeshja e javës së parë është luajtur në Lac. Luftë e fortë sportive, sulme e kundërsulme sa në njërën portë, aq edhe në tjetrën, kanë shoqëruar 90-minutat e mbyllura në barazim 1-1. Racic ka kaluar të kuqtë në epërsi në minutën e 47-të, mirëpo nuk kanë hezituar të reagojnë bardhezinjtë. Të besuarit e Cungut kanë barazuar me Dokun, duke u mohuar “demave” trepikëshin e shumëlakmuar prej tyre. 15 herë kampionët e vendit kanë zhvilluar një pjesë të parë më cilësore, duke arritur t’i imponohen skuadrës vendëse, megjithatë kanë vuajtur në finalizim. Aktivizimi i 19-vjecarit Vatnikaj përkrah Racic nuk ka qenë i efektshëm, ndaj Duro ka bërë lëvizje të menjëhershme me fillimin e pjesës së dytë. Si pasojë ka dalë në dritë edhe goli, por avantazhi nuk është ruajtur shumë nga të kuqtë, që janë ndëshkuar një herë të vetme nga Laci. Pavarësisht përpjekjeve të shumta të të dyja skuadrave për t’i rrëmbyer fitoren njëra-tjetrës, portat e Vujadinovic dhe Alban Hoxhës kanë mbetur të paarritshme më. Në këtë mënyrë, Duro dhe Cungu e nisin me barazim kampionatin e ri, në ndeshjet e tyre të para në

Kategoria Superiore
Java 1
24 gusht 2014
VLLAZNIA – KUKËSI  1-2
Golat: Dibra 43′ / Pejic 35′, Hysa 58′
VLLAZNIA: Selimaj, Gocaj, Beqiri, Sykaj, Boci, Dema (Tafili 56′), Shala, Hajdari (Kalaja 69′), Shtubina, Kruja, Dibra (Markolaj 82′). Trajner: Baldo Raineri
KUKËSI: Halilaj, Smajli, Dushku, Malota, Hallaçi, Lushtaku (Hoxha 63′), Hasani (Shameti 84′), Musolli, Zeqiri, Hysa (Periç 78′), Pejiç. TRAJNER: Artim Shaqiri
KARTONË TË VERDHË: Dibra 20′, Shala 28′, Beqiri 45′/ Hallaçi 42′
Gjyqtarë: E.Jorgji, R.Preca, E.Ganxhi

LAÇI – PARTIZANI   1-1
Golat: Doku 55′ / Racic 47′
LAÇI: Vujadinoviç, Çarls (Cetkoviç 77′), Buljan, Sheta, Sefgjini, Teqja, Doku, Zefi, Veliaj (Thorja 77′), Nimani, Xhejms.Trajner: Armando Cungu
PARTIZANI: Hoxha, Fejzullahu, Rrahmani, Dishilev, Cuculi, Nexhipi, Batha, Mazrekaj(91′ Trashi), Vatnika j(Mustafa 46′), Vila (Fazliu 78′), Raçiç. Trajner: Shpëtim Duro
KARTONË TË VERDHË: Veliaj 44′, Teqja 85′/Cuculi 52′, Batha 71′, Mazrekaj 89′
Gjyqtarë: L.Alla, E.Doda, D.Korreshi

TIRANA – APOLONIA    3-0
Golat: Bakaj 24′, Ndikumana 58′, Hyshmeri 90+1′
TIRANA: Frashëri, Kërçiku, Curri, Muça, Idrizaj (Hyshmeri 82′), Karabeci, Bulku, Ndikumana, Bakaj, Morina (Malaj 67′), Bushiç (Kagere 55′); Trajner: G.Magani.
APOLONIA: Cakoviç, Broshka, Atanda, Nako, Prifti, Gërxho (Rajkoviç 68′), Erkoçeviç, Dosti (Hysenshahaj 56′), Karakaçi (Mitraj 59′), Xhorxheviç, Canka; Trajner: E.Demiraj.
KARTONË TË VERDHË: Curri 39′/ Canka 39′, Hysenshahaj 64′
Gjyqtarë: A. Koci, F.Lamaj, E.Velo

23 gusht 2014
FLAMURTARI – TEUTA    2-1
Golat: Abilaliaj 3′, Gilberto 30′ / Shabani 51′
Gjyqtarë: B.Pashaj, E.Barushi, N.Bregasi

ELBASANI – SKËNDERBEU   0-1
Golat: F.Sefa 9′
Gjyqtarë: E.Sino, I.Tartari, O.Grabova

Ofendime pa fund dhe në fund një shfaqje e shëmtuar, me goditje me gurë e fishekzjarrë, që rrezikuan kokat e forcave të rendit dhe sigurisht qindra tifozëve. Një tjetër ndeshje ka qenë dje në shkallët e stadiumit “Qemal Stafa”, por që i ngjante një guerilje mes tifozërisë së Flamurtarit dhe Skënderbeut. FSHF, si organizatore e takimit, kishte vendosur në tribunën D1 tifozët vlonjatë, ndërsa në D2 ata korçarë. Në një stadium, ku nuk kishte më shumë se 2200 shikues, mendohej se s’do të kishte shenja dhune, por nuk qe e thënë. Fillimisht pati ofendime në kor nga të dyja tifozëritë, që janë bërë rëndom mes vlonjatëve dhe korçarëve. Madje ultrasit vlonjatë nisën të përmendnin edhe emrat e bashkëshorteve të futbollistëve të Skënderbeut. Ndërprerja e parë e lojës erdhi në minutën e 37-të, teksa kapitenët Shkëmbi e Veliu këshilluan tifozët të qetësoheshin. Por, kur mendohej se gjithçka do të kalonte vetëm me ofendimet në kor, shpërtheu revolta. Nisur edhe nga afërsia që kishin me tribunat, dy tifozëritë filluan të qëlloheshin me gurë në distancë. Ka qenë minuta e 80-të e takimit, atëherë kur edhe policia është kapur gafil, pasi nuk priste një rebelim të tillë. Situata doli jashtë kontrollit, teksa tifozët e pranishëm në tribunën A e B, si dhe lojtarët në fushë, shikonin se si fluturonin gurët në sektorët D1 dhe D2. Masa emergjente e policisë ishte shpërngulja e tifozëve korçarë afër tribunës D3, por derisa kjo u realizua breshëritë e gurëve dhe fishekzjarrët vijonin pa pushim. Mësohet se disa tifozë, që u pikasin teksa gjuanin me sende të forta, u shoqëruan në polici.

SHKUMBINI-NAFTËTARI 0-1
GOLI: Zylyftari 61′
SHKUMBINI: Ajazi, Xhyra, Meta, Duka, Kullolli, Nexha, Sulkja, E.Lluca, Çela, Dervishi, Xh.Lluca. (U aktivizuan: Shehu, Sopjani, Duraku, Balliu, Kaca, Deliu, Kollçaku). Trajner: L.Pashja
NAFTËTARI: Mema, Kaja, S.Gega, Daci, Gucaj, E.Alushi, A.Gega, R.Alushi, Kopaçe, Koroveshi, Zylyftari. (U aktivizuan: Çela, Molla, Korra, Kajo, Çekrezi, Hodaj). Trajner: P.Bifsha
GJYGJTARË: D.Zyba, T.Sokoli, E.Spahiu (Peqin)

Shkumbini është mundur me rezultatin minimal 1-0 nga skuadra e Naftëtarit në miqësoren e zhvilluar dje në Peqin, në një sfidë e cila nxori në pah edhe një herë problemet që ka skuadra peqinase. Trajneri Pashja i ka besuar të njëjtit formacion që u përball disa ditë më parë ndaj Elbasanit, por duhet thënë se loja e vendësve ka lënë shumë për të dëshiruar. Ndeshja do të niste nën një ritëm mesatar dhe për minuta të tëra do të mungojnë rastet e pastra në portat respektive. Sulmuesi Dervishi kërkon të karikojë futbollistët e rinj duke i inkurajuar, por faktikisht loja e peqinasve çalon në çdo repart. Nga ana tjetër, skuadra e Naftëtarit organizohet mjaft mirë dhe ndërmerr aksione të rrezikshme drejt portës së Shkumbinit. Në fraksionin e dytë, miqtë pas një aksioni nga e majta kombinojnë bukur në hyrje të zonës peqinase dhe aty Zylyftari arrin të shënojë golin e avantazhit për Naftëtarin. Pas pesë minutash Dervishi ka shansin të barazojë shifrat, por sulmuesi bardhekaltër gabon nga pika e 11-metrave duke e dërguar topin jashtë. Në fund të sfidës, tekniku i Shkumbinit, Pashja u shpreh: “Mendoj se skuadra është paraqitur më dobët në krahasim me takimin ndaj Elbasanit. Të ardhurit në provë nuk më bindën, ndaj gati 90% e tyre do të largohen”. Ndërsa për teknikun Bifsha, sfida e djeshme ishte debutim në stolin e Naftëtarit dhe në fund u shpreh: “Ndihem mirë për këtë fitore. Mora sinjale pozitive nga futbollistët”.syzezi sport.com

Foto Strakosha nuk do të jetë më në drejtimin e kombëtares shqiptare U-19. Portieri i shquar largohet nga stoli kuqezi për të ndjekur një drejtim të ri në karrierën e tij: ai do të jetë pjesë e stafit të skuadrës së njohur greke, Olimpiakos. Në vend të tij, drejtimin e skuadrës do ta marrë në dorë Altin Lala, i cili do të vazhdojë të mbulojë edhe rolin e zv.trajnerit në përfaqësuesen e madhe kuqezi. Rritet në këtë mënyrë angazhimi i ish-kapitenit të kombëtares në përgatitjen e futbollistëve shqiptarë për ekipet e sipërpërmendura.

Skuadra kuçovare, për momentin, është pa trajner. Futbollistët stërviten përkohësisht nga drejtori teknik Agim Prifti. Edhe pse pa stafin teknik, i cili pritet të vendoset shumë shpejt nga bordi drejtues, kontingjenti i futbollistëve që stërviten te Naftëtari gjatë kësaj periudhe, mbetet i plotë, madje ka edhe afrime të futbollistëve që dikur janë aktivizuar me skuadrën kuçovare. Janë rikthyer qendërmbrojtësi Florian Daci dhe portieri Mario Memaj, të cilët para një sezoni ishin pjesë e Naftëtarit, ku skuadra konkurronte në Kategorinë e Parë. Qendërmbrojtësi nga kryeqyteti, Daci, është afruar pikërisht në këtë moment kur mungon trajnere.syzezi sport.com

Tomori zhvilloi të shtunën miqësoren e parë në këtë fazë përgatitore. Beratasit u përballën me Besën në Kavajë në takimin që përfundoi në barazim 2-2. Trajneri Eqerem Memushi mbeti i kënaqur nga paraqitja e të tijve në atë sfidë. Ndërkaq, përveçse përgatitjes, trajneri është i fokusuar edhe te merkato e verës. Synimi i tij është që të afrojë sa më shumë lojtarë me eksperiencë. Pas disa emrave të parë, dy të tjerë kanë dalë në skenë këto ditë. Bëhet fjalë për portierin Erikson Aga dhe mesfushorin Arvist Gjata.
Tratativat Burime të sigurta pranë klubit beratas bëjnë të ditur se të dy lojtarët janë shumë pranë afrimit te Tomori. Skuadra është në kërkim të një portieri cilësor, në një kohë që gjatë kësaj periudhe u afruan disa në provë. Por duket se drejtuesit kanë menduar për Agën. Bëhet e ditur se këto ditë, gardiani do t’i bashkohet skuadrës në stërvitje dhe sipas të gjitha gjasave, do të firmosë për beratasit. Aga rikthehet sërish në Shqipëri pas një eksperience 1-vjeçare në Maltë, në një kohë që më parë ka luajtur për Mamurrasin, Tërbunin, Albpetrolin dhe Turbinën. Emri i dytë që bëhet i ditur është ai i Arvist Gjatës. Me këtë të fundit duket se është arritur plotësisht marrëveshja dhe këtë javë do t’i bashkohet skuadrës në stërvitje. Mesfushori ishte pjesë e Shkumbinit dhe prej disa vitesh ka qenë një lojtar shumë i rëndësishëm për peqinasit. Tashmë, duket se ai ka vendosur të zgjedhë Beratin për të vazhduar karrierën e tij. Tri ditë më parë, në klub pati probleme të brendshme. Tre futbollistë të rinj u përjashtuan nga skuadra pas përplasjes që patën me trajnerin Eqerem Memushi. Ky, në shenjë proteste, nuk e nxori skuadrën në stërvitje për dy ditë. U desh një mbledhje e bordit drejtues të klubit për të përjashtuar lojtarët që puna të riniste normalisht. Të shtunën, ekipi zhvilloi ndeshjen e parë miqësore të kësaj faze përgatitore. Pavarësisht se lojtarët vinin pas dy ditësh pa stërvitje, bënë një paraqitje shumë të mirë dhe trajneri Memushi mbeti i kënaqur. Stafi teknik ka parashikuar që të zhvillojë miqësore të tjera në ditët në vazhdim.

Strategjia e klubit, ekip me të rinj
Në fund të muajit maj, ish-presidenti i Partizanit, Lulëzim Sallaku, shprehu dëshirën për të privatizuar klubin e Tomorit. Pavarësisht se palët diskutuan për shumë javë me radhë, në fund nuk u arrit asnjë marrëveshje. Sallaku akuzoi bashkinë për mungesë vullneti, në një kohë që institucioni vendor hodhi akuza në drejtim të Sallakut. Në këtë mënyrë, ekipi mbeti në dorën e Bashkisë dhe drejtuesit kanë bërë të ditur se do të krijojnë një ekip kryesisht me lojtarë të rinj. Sipas tyre, do t’i jepet përparësi futbollistëve të ekipeve zinxhirë që do të afrohen te skuadra e parë.syzezi sport.com

Te Tomori është konfirmuar zyrtarisht kreu i bankinës, që do të drejtojë ekipin për sezonin e ardhshëm. Ashtu siç edhe e kishte lajmëruar një ditë më parë gazeta “Panorama Sport”, dje është bërë prezantimi i teknikut të ri, Eqerem Memushi. Ajo që pritej me interes, ishin emrat e tjerë të stafit teknik. Madrid Muxhaj, i cili deri dy ditë më parë ishte trajneri i Tomorit, tashmë kalon në rolin e zv/teknikut. Ndërsa Elton Fani do të vijojë si fizioterapist te beratasit. Prezantimi është bërë në ambientet e stadiumit “Tomori”, ku i pranishëm ishte edhe shefi i klubit, Polizoi Kuqo. Trajneri vlonjat kthehet të drejtojë ekipin beratas për herë të tretë në harkun kohor të po tri viteve. Si në vitet e mëparshme, edhe tani, vlonjati do të ketë në dorë krijimin e ekipit për sezonin 2014-2015. Eqerem Memushi edhe në dy herët e mëparshme ka marrë drejtimin e ekipit përpara merkatos verore. Tashmë pritet me mjaft interes se cila do të jetë organika e ekipit. Tomori aktualisht nuk ka asnjë lojtar nën kontratë dhe krijimi i skuadrës do të bëhet nga e para. Me shumë gjasa, kontingjenti me lojtarë të rinj do të jetë sërish pjesë e ekipit beratas. Gjithashtu mund të ketë rinovime edhe nga një pjesë e mirë e senatorëve.