SHKUMBINI-NAFTËTARI 0-1
GOLI: Zylyftari 61′
SHKUMBINI: Ajazi, Xhyra, Meta, Duka, Kullolli, Nexha, Sulkja, E.Lluca, Çela, Dervishi, Xh.Lluca. (U aktivizuan: Shehu, Sopjani, Duraku, Balliu, Kaca, Deliu, Kollçaku). Trajner: L.Pashja
NAFTËTARI: Mema, Kaja, S.Gega, Daci, Gucaj, E.Alushi, A.Gega, R.Alushi, Kopaçe, Koroveshi, Zylyftari. (U aktivizuan: Çela, Molla, Korra, Kajo, Çekrezi, Hodaj). Trajner: P.Bifsha
GJYGJTARË: D.Zyba, T.Sokoli, E.Spahiu (Peqin)

Shkumbini është mundur me rezultatin minimal 1-0 nga skuadra e Naftëtarit në miqësoren e zhvilluar dje në Peqin, në një sfidë e cila nxori në pah edhe një herë problemet që ka skuadra peqinase. Trajneri Pashja i ka besuar të njëjtit formacion që u përball disa ditë më parë ndaj Elbasanit, por duhet thënë se loja e vendësve ka lënë shumë për të dëshiruar. Ndeshja do të niste nën një ritëm mesatar dhe për minuta të tëra do të mungojnë rastet e pastra në portat respektive. Sulmuesi Dervishi kërkon të karikojë futbollistët e rinj duke i inkurajuar, por faktikisht loja e peqinasve çalon në çdo repart. Nga ana tjetër, skuadra e Naftëtarit organizohet mjaft mirë dhe ndërmerr aksione të rrezikshme drejt portës së Shkumbinit. Në fraksionin e dytë, miqtë pas një aksioni nga e majta kombinojnë bukur në hyrje të zonës peqinase dhe aty Zylyftari arrin të shënojë golin e avantazhit për Naftëtarin. Pas pesë minutash Dervishi ka shansin të barazojë shifrat, por sulmuesi bardhekaltër gabon nga pika e 11-metrave duke e dërguar topin jashtë. Në fund të sfidës, tekniku i Shkumbinit, Pashja u shpreh: “Mendoj se skuadra është paraqitur më dobët në krahasim me takimin ndaj Elbasanit. Të ardhurit në provë nuk më bindën, ndaj gati 90% e tyre do të largohen”. Ndërsa për teknikun Bifsha, sfida e djeshme ishte debutim në stolin e Naftëtarit dhe në fund u shpreh: “Ndihem mirë për këtë fitore. Mora sinjale pozitive nga futbollistët”.syzezi sport.com

Tomori zhvilloi të shtunën miqësoren e parë në këtë fazë përgatitore. Beratasit u përballën me Besën në Kavajë në takimin që përfundoi në barazim 2-2. Trajneri Eqerem Memushi mbeti i kënaqur nga paraqitja e të tijve në atë sfidë. Ndërkaq, përveçse përgatitjes, trajneri është i fokusuar edhe te merkato e verës. Synimi i tij është që të afrojë sa më shumë lojtarë me eksperiencë. Pas disa emrave të parë, dy të tjerë kanë dalë në skenë këto ditë. Bëhet fjalë për portierin Erikson Aga dhe mesfushorin Arvist Gjata.
Tratativat Burime të sigurta pranë klubit beratas bëjnë të ditur se të dy lojtarët janë shumë pranë afrimit te Tomori. Skuadra është në kërkim të një portieri cilësor, në një kohë që gjatë kësaj periudhe u afruan disa në provë. Por duket se drejtuesit kanë menduar për Agën. Bëhet e ditur se këto ditë, gardiani do t’i bashkohet skuadrës në stërvitje dhe sipas të gjitha gjasave, do të firmosë për beratasit. Aga rikthehet sërish në Shqipëri pas një eksperience 1-vjeçare në Maltë, në një kohë që më parë ka luajtur për Mamurrasin, Tërbunin, Albpetrolin dhe Turbinën. Emri i dytë që bëhet i ditur është ai i Arvist Gjatës. Me këtë të fundit duket se është arritur plotësisht marrëveshja dhe këtë javë do t’i bashkohet skuadrës në stërvitje. Mesfushori ishte pjesë e Shkumbinit dhe prej disa vitesh ka qenë një lojtar shumë i rëndësishëm për peqinasit. Tashmë, duket se ai ka vendosur të zgjedhë Beratin për të vazhduar karrierën e tij. Tri ditë më parë, në klub pati probleme të brendshme. Tre futbollistë të rinj u përjashtuan nga skuadra pas përplasjes që patën me trajnerin Eqerem Memushi. Ky, në shenjë proteste, nuk e nxori skuadrën në stërvitje për dy ditë. U desh një mbledhje e bordit drejtues të klubit për të përjashtuar lojtarët që puna të riniste normalisht. Të shtunën, ekipi zhvilloi ndeshjen e parë miqësore të kësaj faze përgatitore. Pavarësisht se lojtarët vinin pas dy ditësh pa stërvitje, bënë një paraqitje shumë të mirë dhe trajneri Memushi mbeti i kënaqur. Stafi teknik ka parashikuar që të zhvillojë miqësore të tjera në ditët në vazhdim.

Strategjia e klubit, ekip me të rinj
Në fund të muajit maj, ish-presidenti i Partizanit, Lulëzim Sallaku, shprehu dëshirën për të privatizuar klubin e Tomorit. Pavarësisht se palët diskutuan për shumë javë me radhë, në fund nuk u arrit asnjë marrëveshje. Sallaku akuzoi bashkinë për mungesë vullneti, në një kohë që institucioni vendor hodhi akuza në drejtim të Sallakut. Në këtë mënyrë, ekipi mbeti në dorën e Bashkisë dhe drejtuesit kanë bërë të ditur se do të krijojnë një ekip kryesisht me lojtarë të rinj. Sipas tyre, do t’i jepet përparësi futbollistëve të ekipeve zinxhirë që do të afrohen te skuadra e parë.syzezi sport.com

Te Tomori është konfirmuar zyrtarisht kreu i bankinës, që do të drejtojë ekipin për sezonin e ardhshëm. Ashtu siç edhe e kishte lajmëruar një ditë më parë gazeta “Panorama Sport”, dje është bërë prezantimi i teknikut të ri, Eqerem Memushi. Ajo që pritej me interes, ishin emrat e tjerë të stafit teknik. Madrid Muxhaj, i cili deri dy ditë më parë ishte trajneri i Tomorit, tashmë kalon në rolin e zv/teknikut. Ndërsa Elton Fani do të vijojë si fizioterapist te beratasit. Prezantimi është bërë në ambientet e stadiumit “Tomori”, ku i pranishëm ishte edhe shefi i klubit, Polizoi Kuqo. Trajneri vlonjat kthehet të drejtojë ekipin beratas për herë të tretë në harkun kohor të po tri viteve. Si në vitet e mëparshme, edhe tani, vlonjati do të ketë në dorë krijimin e ekipit për sezonin 2014-2015. Eqerem Memushi edhe në dy herët e mëparshme ka marrë drejtimin e ekipit përpara merkatos verore. Tashmë pritet me mjaft interes se cila do të jetë organika e ekipit. Tomori aktualisht nuk ka asnjë lojtar nën kontratë dhe krijimi i skuadrës do të bëhet nga e para. Me shumë gjasa, kontingjenti me lojtarë të rinj do të jetë sërish pjesë e ekipit beratas. Gjithashtu mund të ketë rinovime edhe nga një pjesë e mirë e senatorëve.

Nga ndeshja Apolonia-Tomori 1-0

Duket se stadiumi i rikonstruktuar “Loni Papuçiu” dhe fakti që tashmë Apolonia i luan ndeshjet me drita u kanë sjell fat fierakëve. Skuadra e Elidon Demirajt ka regjistruar dje fitoren e radhës, pasi ka mundur Tomorin me rezultatin 1- 0. Fierakëve u ka mjaftuar një gol i Mitrajt në pjesën e parë për të siguruar 3-pikëshin. Apolonia vazhdon të jetë në vendin e dytë, në një kohë që është shkëputur më shumë nga ekipet ndjekëse pas rezultateve negative të tyre.

APOLONIA-TOMORI 1-0
GOLI: Mitraj 31′
APOLONIA: Miço, Nako, Naçi, Dosti, Broshka, Dakavelli, Erkoçeviç (Sallaku 85′), Papa, Gega, Mitraj (Adenkule 60′), Sako (Thankgod 61′). Trajner: E.Demiraj
TOMORI: Kaloshi, Avdo, Kusta, Bitri, Berberi, Çaço, Gega (Gjini 88′), Arbri (Shinko 89′), Uzuni (Sharavolli 80′), Myzyri, Foniqi. Trajner: M.Muxhaj
KARTONË TË VERDHË: Dosti 83′, Avdo 89′, Kusta 63′, Bitri 75′
GJYQTARË: K.Meta, B.Mesi, D.Agaraj (Tiranë)
VËZHGUES: I.Gashi (Durrës)
DELEGAT: V.Zëri (Tiranë)

Ndeshja Sfida nis e bukur dhe e shpejtë për ekipin vendës, që menjëherë kërkon të marrë epërsinë ndaj kundërshtarit. Papa, Mitraj e Erkoçeviç, edhe pse arrijnë të depërtojnë here pas here mes mbrojtjes mike, nuk kanë qetësinë e duhur në gjuajtjet e tyre për të finalizuar aksionet sulmuese. Rastin e parë për shënim e kanë vendësit në minutën e 8-të. Erkoçeviç kroson në zonë dhe Gega, me një kërcim të bukur mbi mbrojtësit miq, godet me kokë, por topi përplaset në shtyllë. Pa kaluar një minutë, Foniqi për miqtë pas një kundërsulmi të shpejtë dhe një depërtimi të bukur gjuan nga rreth 18 metra, por grushton portieri Miço. Në minutën e 25- të Apolonia gjendet shumë pranë golit kur Mitraj, pas një depërtimi të bukur brenda zonës gjuan, por topi nuk arrin të përfundojë në rrjetë, pasi shpëtimtari i portës është sërish portieri Kaloshi. Minuta e 31-të do të sjellë golin e avantazhit për Apoloninë. Dakavelli pason bukur te Mitraj brenda zonës që, pasi ecën 2-3 metra diagonal me portën, gjuan fort dhe e dërgon topin në rrjetë. Entuziazëm te fierakët, por edhe në shkallët e stadiumit. Fraksioni i dytë nis më i bukur dhe me ritëm më të lartë, pasi Tomori ekuilibron lojën dhe me anë të kundërsulmeve kërkon të rrezikojë e të shënojë golin e barazimit në portën fierake. Rastet për shënim në 15 minutat e para të kësaj pjese janë prezent sa në njërën portë, edhe në tjetrën, por pa mundur që skuadrat të shënojnë. Apolonia luan me pasime të shumta, por dhe sulmon rrezikshëm. Jo vetëm me Papën dhe Erkoçeviç, por tashmë edhe me Adenkulen e Gegën që shikohen më shpesh në ndihmë të sulmit të tyre. Ndërsa loja e Tomorit pëson një rënie dhe kundërsulmet e saj janë të rralla dhe shumë herë individuale. Në minutën e 87-të vendësit kanë rastin e artë për ta dyfishuar rezultatin, kur fitojnë të drejtën e ekzekutimit të një 11-metërshi, por goditja e Papës grushtohet nga Kaloshi. Minutat e mbetura, përfshirë dhe ato shtesë, nuk do të sillnin ndonjë gjë të re për sa i përket rezultatit.