Finalja e Ligës së Europës, luajtur mbrëmjen e së mërkurës në “Juventus Stadion”, ka prodhuar luftë të fortë sportive mes dy skuadrave, por asnjë gol në 120 minuta lojë. Benfika e mësuar me finale të tilla, por me mjaft dështime në këtë “stacion” të kësaj gare, rikthehej aty ku kishte siguruar finalen, pasi superoi bardhezinjtë e Kontes, e familjarizuar disi me ambientin, por duke pasur edhe më shumë tifozë në mbështetje, ndërsa Sevilja vinte pas një kualifikimi “in extremis” ndaj Valencias në gjysmëfinale. Gjithsesi, të gjitha këto ishin harruar dhe palët kanë performuar me një përkujdesje maksimale në prapavijë, për të mos pësuar, dhe me dëshirë të madhe për të dalë në kundërsulm e për të ndëshkuar kundërtshtarin. Më kërkuese, me më shumë zotërim të topit, por pa finalizimin e duhur, është paraqitur skuadra portugeze e Horge Hezus, ndërkohë që spanjollët kanë qenë më të qartë taktikisht dhe kanë administruar potencialin e vet disi më të paktë se Benfika. Në shkallën sipërore të performancës mund të vlerësohen dy portierët respektivë, që e kanë mbajtur ndeshjen të hapur me pritjet e tyre, në bardhësinë e shifrave, deri pas 120 minutash lojë. Pra, për të përcaktuar fituesin e këtij trofeu nuk ka mjaftuar koha e rregullt, por as dy shtesat me nga 15 minuta. Për pasojë, gjithcka duhej të zgjidhej nga pika e bardhë e penalltive. Së andejmi ka vazhduar mallkimi për “shqiponjat” e benfikës, me finale e tetë të humbur në Ligën e Europës. Portieri portugez i andaluzëve neutralizoi dy penallti, të Kardozos dhe Rodrigo, duke bërë që Sevilja të triumfojë në Europë.WWW.SYZEZISPORT.COM